Wii 毒上身

聖誕夜，有人放Wii毒，我被網球拍所傷，亦打爆左天花橫樑。幸好受傷非重，毒力非深，尚可支持。

但除夕夜再比 [搖控] 同 [雙節棍] 兩件同時夾擊！就立即小命不保，毒發上腦。失去理智同耐性，腦部運算功能全失，多次運算犯錯。

朋友們你地好毒，但有心! 非常合用，多謝！

HB

i-Jacket

好襯,多晒!

Wii for All

最新一代的電視遊戲主機經已全部正式面世，三大主機，xBox 360, PS3, Wii,係聖旦節前的爭霸戰正式開始。

一開始 Wii 的策略看似佔優，引入全新遊戲概念，先吸引一班非機迷注意，比起 PS3，十個話想玩九個想買 Wii，第十個只因真係唔打機既。價錢走大眾路綫，三部之中最平，USD$250。出貨量最多，打算年尾出貨巳係 PS3 預算的既兩倍。嶄新設計有趣的遊戲比續集再續集的更令人想擁有 Wii。

一起步策略領先，之後就看主機有沒有內在問題，遊戲生產商有沒有全力支持。

好想玩！

小心打爆個電視機

Spider-man Spider-man, does whatever a spider can!

第一集由平凡人變成異能人，從叔叔的死，明白到 ＂With great power comes great responsibility＂，將自己的超能力用於正義，而非報仇或者破壞社會。第二集由超人回到平凡，原來超人亦是人，為生活要賺錢，要犧牲生活及愛情。從正義與生活之間做選擇。兩集都拍出漫畫想說的東西。

到第三集 Sandman 出場，好友 Harry Osborn 成魔為父報仇，自己為了提高作戰能力與魔為伴。最後要擺脫魔化戰衣控制，自己和心魔决鬥，從而引出一位重要人物 Venom，成為漫畫其中一段精彩故事，受歡迎的角色。

承担，决擇，除心魔，三集起承轉合，由 Peter Parker 變成蜘蛛俠完全體，更人性化同合理。Spider-man 漫畫不是我的最愛，但電影版又幾喜歡。

ｏ７年５月４日見，Trailer 頂住先!


Trialer in High-Defination at iFilm

ABC 破了!

直至昨日......

一班同學朋友，一齊大，一齊玩既第二代中，全部八個都係仔!

今天早上，傳說中既 All Boys Club 宿命終於打破左!

"萬綠叢中一點紅"

恭喜晒!

中環天星碼頭

環境隨時間變遷好正常，但為何不可以保留鐘樓，或者搬遷到其他地方發展成旅遊景點呢?
世界各地，有歷史背景的人、物、地，就可成為旅遊景點吸引遊客。
澳門除了賭，亦有歷史建築吸引遊客。

回憶在心中!

中環天星碼頭 from Flickr

集體相片回憶 : 我們的天星

鏗鏘集 - 鐘，為誰而敲？

牛花盛放

「高流灣」肥牛

打邊爐狂熱又開始，牛肉..肥牛係必需品，其他火鍋料都唔重要。亞芬帶左我地去開張兩個月的「高流灣」，佢之前去完覺得好正，所以約人再去，可以試更多種類。

「高 流灣」主打海鮮，自設魚場係高流灣養，一條鱆紅魚做刺身可以比外面平一節。所以先試鱆紅魚刺身、蝦刺身同象拔蚌刺身，的確新鮮，蝦頭魚頭仲可椒鹽再吃。火 鍋料當然要雪花肥牛，一碟排列整齊紅白分明的肥牛完全合格，有油香有牛味。再來一個本地肥牛，一試就發現牛味更濃更有咬勁。大蟶子，鮮甜，嫩滑，爽，好味。牛肉粒更好味在啖啖肉香。

「高流灣」本地肥牛

其中一位老板介紹大泥鯭，但肉質散散，我就唔鐘意啦，不過魚本身都新鮮。與老板傾計時，佢全力介紹經營方法比其他出名的更有心，更忠誠。客人投訴品質不合格，亦會有錯就認。所以朋友投訴大泥鯭不合口味，老板亦送上班片補償。

其實係附近有間「牛皇星」，佢將肥牛分得更精，有牛頸，牛脊，牛邊，牛翼，一睇就可以分得出係有分別，再食落就知各有特式。牛翼味濃，牛頸軟滑，適隨尊便，任君選擇。牛肉粒亦是美味甘香啊！牛皇星都有海鮮，但係我是牛魔王，所以我只係食左肥牛類。墨魚滑新鮮，但四宝丸就唔好食得黎貴，唔值！為食各式肥牛可以一試！

「牛皇星」- 牛頸，牛脊，牛邊，牛翼

「牛皇星」- 牛肉粒

高流灣海鮮火鍋酒家
地 址 ： 尖沙咀山林道21-23號1樓
電 話 ： 3520-3800

牛皇星
地 址 ： 佐敦吳松街153號地下
電 話 ： 2199 7933

Krispy Hallo Kreme

送上一打哈佬喂特別版,
祝 Happy Halloween!

另送半打優惠靚仔版!

我真係好鍾意．．．嗚．．．嗚．．．
食 Krispy Kreme 咖．．．嗚．．．


甜不得? Krispy Kreme

小小心意

萬萬聲高潮疊起生日大派對 經過大半年，
ahsou 作出小小心意，
印制精美記念冊答謝各位好友支持。
順便借花敬佛，
祝 週年紀念。

Welcome to the World!

Feel the World. Touch the World. Welcome!

放.逐

感覺 劇照好正﹔原來 鏡頭都好正

感覺 服裝好靚﹔原來 槍戰仲好型
感覺 美術認真﹔原來 型要超現實
感覺 槍火續集﹔原來 冇槍火驚喜
感覺 故事有趣﹔原來 兄弟情與義
感覺 歐陸浪漫﹔原來 澳門勝香港

放.逐

迷上癮！BUNDABERG

我體內流着的係可樂，屋企雪櫃有氣飲品只有可口可樂，別無其他！

但最近發現屋企附近，可以自己去搬到嘅超市裹面，都有哩隻薑啤。見到有特價，一時失心瘋，即刻掃晒架上嘅薑啤走！味道當然好啲，薑味同甜味比較平行，又夠氣！

迷上癮！飲完我的血開始有點淡！

BUNDABERG

在 Chaweng Beach Road 穿梭

蘇梅島 (Koh Samui) ，面積大約等如四個香港島，交通綱絡簡單，主要道路就係圍住個島走一圈，再伸廷到山林或小區中。想四維玩，可以包架10人客貨車連司機、租車(四驅或房車)、租電單車、坐的士、坐貨車仔 Songteaw、坐電單車。

八個人，租四驅車就要兩架800Bht x 2 (另加油費)，仲要自己揸﹔包一架空調十人客貨車八小時，每人每小時 37.5Bht。而且行動统一，唔怕走失。所以就包左架車，1400 至 2200 環島遊。去食大排擋、瞭望點、亞公亞婆石、瀑布、沒有太陽的日落晚餐、穿越 Nathon 漁港、Tesco 狂掃零食做手信，真係走左一個圈環島冇回頭路。全程司機只負責揸車，路綫行程由客人提供，司機熟識各景點，在適當時侯提供意見及資料，仲不收取貼士(係比都唔收)。

住係蘇梅島東邊，主要活動都集中係 Chaweng Beach Road，行街、食飯、按摩、飲酒，條街起碼有四五公里長，各式的士就係主要交通工具。正宗四人的士大約 300 Bht 一架仲要x2，八個人出街食飯真係有壓力。通街都係Songteaw，好多遊客都坐，冇理由唔試下「擒車」！求其問一架，每位40Bht。我地還價200Bht 有八個人咖，大客仔，立即成交！Numbers does matter 嗎！車尾上落，冇門，即刻玩「擒車」，捉實手把，踩住腳踏，好似玩 Wakeboard 咁！再同街上遊客揮手，好鬼好玩！跟住以後全程Songteaw，但零晨點幾 Songteaw 收工就冇得搞，要揾的士。

有日行左成粒鐘沙灘，打算坐 Songteaw 返酒店，點知冇車。唔想兩個人坐的士，但又要趕去做 SPA時，比我捃到「擒車」至高境界！13号先生！立即問價，40Bht一位！同Songteaw一樣價？趕時間都要講價，10Bht都剎，70Bht兩個，上車！其實架電單車坐三個人係有少少勉强。有個遊客見到都玩，話﹕「Oh! no more room? next time!」但咁難得咁鬼好玩，慢慢行，慢慢片，冇問題啦！上斜時，我最大件，變成重心在後，幾騖前輪離地，跟住我就後腦著地，然後失憶。十分鐘就返到酒店。同13号先生影相時佢即刻擺 Pose ，幾搞鬼！

其實人少少，四個人，又有車牌，租車係最好玩o既選擇！

在 Koh Tao 飛行

在泰國 (Thailand) 蘇梅 (Koh Samui) 鄰近，
龜島 (Koh Tao) 徒手潛水，游上游落，自由自在。
隨時有班珊瑚魚跟你一齊游，一齊跑。
水清光亮，遠遠已可以見到一班魷魚企係到開會。
如果個肺再大o的，水中飛行再長o的就好啦!

如果可以聽住 Deep Blue Day，好似 trainspotting 瓹入屎塔潛水咁，就高興死!!!

在 Koh Samui 悠遊

泰國蘇梅島五日。

三小時直航，踏足小島機場，專車送到酒店巳經係下午四點半。安頓好未來兩日節目，立即走出海邊，先探日落後的 Chaweng Beach。由北至南連綿數公里沙灘又長又直，海床平旦，潮漲後水面波平如鏡，水清沙幼。可惜酒店沙灘椅霸阻沙灘好多位，潮漲時沙灘變得好狹窄。

酒店位於長灘北面，廿分鐘步行到全島最熱鬧中心，絕對靜中帶旺。四十多間房，範圍細細，最重要有個向海 infinity pool，仲係不澀眼佩方，潛水可以唔用潛水鏡。

一開始食左一餐海鮮拼泰菜，唔掂。之後的石爐燒 Pizza，街邊河粉，車仔花式耶子朱古力簿餅，日落泰菜，意大利菜，都好滿意。以價錢計都係水準之上。

已經有安排沙灘泳池時間，但硬係覺得唔夠，有點趕時間。因為係一團八個人，節目安排就要多元化一點，水一定要玩，街唔行唔得，景點名勝都要睇下，按摩同Spa更不可能少。如果係自己一兩個人，反而我可能只係沙灘曬吓，浸吓水就好滿意。太陽開足工就更加開心。

五日結束，去唔到至 high，冇意外驚喜。但 WYPWYG，悠下遊下。

可以再訪。

電視新聞頭條

今日電視新聞，香港頭條係太古城地盤火警。

我親眼目睹整過程!

1709 地盤環保上蓋著火，火柱衝上高至七樓，熱力撲面。

1710 打999報警

1715 消防車到達

1720 三條水o侯加升降台

1735 完全撲滅


有4人受傷，估計是機件過熱，引起上蓋著火。

無線電視，有線電視和亞洲電視的相片由我提供。

穿 Prada 的惡魔

I'm Pass!


這份工的性質就是這樣，聲明在先，沒有投訴。
做好這份工作，並不表示失去自己的理想，只是不是妳的理想。

不能接受？可以轉工，但能幹的人一樣可以完成每一份工作。

魔鬼沒有改變她，她的本質還在，還被肯定。

浩浩蕩蕩Hea住食住游沙妹

各位團友,

距離出發日期仲有 7 日, 係時候開茶會啦!

Go Go Koh Samui !!!

三越等

從前出街，去銅鑼灣，不論是打機，睇戲，食飯，上人地屋企，行年宵，拜年，聖旦節‧‧等等
有一班朋友係一定會話﹕「三越等！」，齊人再出發。
貪佢有冷氣，冇咁多人。

約一班人，一定有人遲到，等到齊人可能要成個鐘。
青春就係咁樣燃燒了。

忘記了，有幾耐冇再約人係三越等。

森麻走了

離晒大譜！森麻妳走都唔通知聲，今年做乜咁早走啊！留都留妳唔到！趕着去澳洲定南美？今年我都冇乜點見妳。尤其是星期六日，我得閒想揾妳時，妳就走!

我決定去蘇梅再見一見妳，到時唔好走開，等我！唔該晒！

AV總指揮

自從AV2100死後，一统江湖的平衡世界立即消失，曾經代表自己單位的領導重新接掌一切事務，各自為政。客廳中怱然又再屍橫片野。所有搖控東一隻，西一隻。

幾經尋找終於從美國重金禮聘，最新一代AX4000來港。代替上任總指揮，再次一统AV江湖。一人分飾九角，上至冷氣機，下至收音機。更可自訂時間執行指令，又可依次執行一串步驟，啟動一連串電氣。

最重要係 SONY 出品，靚仔。

草蜢 Forever?

絕對不是草蜢歌迷，但亦不反感，歌有好的也會唱！組成二＋年，音樂的集體回憶一定有，所以入場唱與跳亦沒有問題。

草 蜢06演唱會編排設計和「我們的演唱會」差不多。但就是差不多即是沒有驚喜或新名目，甚至控制氣紛亦一樣，「忘情森巴舞」如是，「我們」如是，可能就只是 「我們的演唱會」一個廷續。開場首半小時勁歌熱舞後，無以為繼，氣紛冷下來。最大問題係台上說話的稿寫得差，雖然內容看似感性，但對他們的說話沒有一點感 覺，互相的台詞時間掌握不到，亦不順暢。

正如蘇志威話，草蜢能怱然吸收了一班年輕新歌迷，三場變六場，証明草蜢並非回來了，而是一直都 在，一直還是能跳能唱絕不馬虎。這些歌迷可能從未見過草蜢台上表演，市場又跳又唱同類對手又沒有。草蜢不作什甚，只要將過去好的再演一次，年輕人碰上勁舞 就會驚為天人，一定有一班新人加入。感覺就是他們不需要或者沒有特別排練就上台了，是好是壞，見仁見智。

到最後一小時才是高潮，如果可以 將心情投入去開派對，感覺亦可以，但就如喝了 Diet Coke，只留係口內，流不到血裹。對於他們三人，勁歌加熱舞跟本就沒有難度，二十年的功力，水準亦不會差得到那褢去。令到全場觀眾舞動，一輪回憶附助的 串燒過後，他們唱的，跳的也沒深刻印像了。如像全程坐在我旁邊的哥哥連 Diet Coke 也不喝的，就只好吃我幾腳派對無影腿了。哥哥，你知道自己在那裹嗎？草蜢是要站著看的!

多謝銀河娛樂界吹水代表温先生，並沾芬小姐的光，才有機會入場。

甜不得? Krispy Kreme

真係頂唔順？Krispy Kreme 真係甜到食一個都唔得?
甜係甜，但我都可以一次消滅到幾個的話，咁都未至於見甜封喉！

比起有o的似麵包的 Dunkin' Donuts ，Krispy Kreme 係更鬆軟，更似一陣甜風。唔使叫替身使者，半打 Original Glazed 一定冇問題!

一般 Donuts 即買即食係最好味，隔夜就差o的，好似 Dunkin' Donuts 就有o的硬！但佢地就ok喎！返叮八秒一樣好味鬆軟。香港先出十五款，下次再來一打十二款先！

NBC Digital 3-D in select Theatres

今年Halloween, Disney與Tim Burton 把 Nightmare Before Christmas 重新數碼三維化, 戴上特製眼鏡可以見到Jack and Sally 係你身邊走來走去!但香港唔知幾時有? DVD 睇唔睇到3-D?

The Nightmare Before Christmas 3D Trailer

環保小風扇

係HMV 買Tee, 有記念品送.......一把小風扇,
佢除左係風扇,仲係宣傳工具.
HMV 由右邊搬去左邊, 係咁意都要做點宣傳.
初時見到把扇都已經ok, 可以係黎緊旅行時用,
開動後見到走馬燈,直頭覺得係正+掂!


一物二用真係環保!

起碼我睇完唔會掉左佢!又會幫佢做下宣傳!

加勒比海盜：決戰魔盜王

我歴盡千山萬水終於可以做回黑珍珠的船長，可惜好境不常，大飛(Davy Jones)又要追回當年我欠他的百年服務之約。而大飛更派出海魔 Kraken 邀請我一聚。我立即指示黑珍珠上岸避一避。

大 飛他們的水手服非常精美，有搥頭鯊版、有鸚鵡螺版、又有海藻、又有珊瑚，非常迫真。大飛的八瓜魚面具更許許如生，每條觸鬆鬚都活靈活現，ILM 的手工真是一流。我為了這套水手服可能真的會和大飛簽約。但我還是喜歡巴布船長(Captain Barbossa)的月光骷髏服，新穎有趣，氣勢亦强橫一點。


黑 珍珠在 Pelogasta Island上岸後，看到一班土人熱烈地歡迎我，真是有點受寵若驚。自從奪回黑珍珠後我也改變了，陰陽怪氣的性格收儉得有點令人失望，真不明白他們為什麽 還這麼歡迎我？他們請我登上聖座，奉我為他們的神，準備燒去我的驅体助我返回天上！！！正在盤算如何自救時，看到維(Will Turner)被土人抬著上來。


維看到我後立即大叫﹕「積，我專誠來找你，我需要你的指南針救伊莉(Elizabeth Swann)！」我也自身難保，可以怎樣救伊莉。



他 們把維和其他船員拘禁在懸涯上的吊籠中，同時亦準備助我升天。時間非常緊迫，柴枝火把已準備好，全賴維成功逃走，分散土人的注意力，我才可以狼狽地逃走， 情況驚險有趣，小朋友看到後也會拍手。但維的逃走經過也不比我的容易，在海邊我和維重遇並一起返回黑珍珠逃出小島，可憐鎖匙小狗做了我的代罪羔羊。

既然黑珍珠己出海，與其給海魔追殺，倒不如我去見大飛解決我們的問題，但是…不是由我和大飛談，我騙維說﹕「如要救伊莉先要把大飛的鎖匙拿到手。」偷扼拐騙是我的專長。這又有何難度。

維 偷上大飛的潛水船(Flying Dutchman)後，差不多立即就被船員制服，更差的情況是，我被大飛發現了我在偷看。最後談判結果是一百個靈魂，加上維登我尚欠九十九個。我只有出外 尋找。原來船員也流行「大話骰」，如果我知道可以和大飛對賭大話骰，我就不需收買靈魂。比賽欺騙，有誰及得上我？維登在船上終於可以遇到他的父親標 (Bootstrap Bill)，可惜標為了幫助維偷鎖匙而失去一生自由。

我在Tartuga Port收買靈魂時，給我遇上了逃出了的伊莉，我發現她能夠使用我的指南針去尋找我的救星-藏在寶箱中的大飛的心。二話不說，立即騙她上船說維和我一起，但先要找出大飛的寶箱。那個失敗失意的諾寧頓(Norrington)上校亦跟着她出發。


全賴伊莉，我們很快便找到寶箱所在的小島。當我們找到寶箱時，同一時間維亦登岸上沙灘，原來大飛發現鎖匙不見了，決定取回寶箱以防維可以開啓它。

大飛已在附近，我要寶箱助我解除追殺令，維要毁減它，諾寧頓要奪取它來控大飛，我們三人意見不合，即時大打出手，爭奪鎖匙。


三人互相打鬥，由沙灘到樹林再上山，然後由山上滚回海邊，過程很像我路經南中國海小漁港時所看到的電影動作，驚險萬分。


大飛的船員趕來後，我在混亂中把大飛 的心偷龍轉鳳，所以我很安心地返回黑珍珠逃走。不消一刻，大飛的船經己追來，正想以大飛的心威脅他時，才發現黄雀在後，諾寧頓偷走了我的皇牌。

我立即追踪 諾寧頓，就在此時大飛號召海魔來消滅我們,看到各人在黑珍珠受到襲擊，為了我的朋友我決定返回船上協助他們。海魔的攻擊就如傳說一樣，伸出巨爪壓碎船身， 維用火藥加上我的至愛蘭姆酒暫時擊退它。我決定棄船，放棄黑珍珠。

正 當大家棄船上小艇時，伊莉用她的美色把我鎖在船上，她要以我作為海魔的 目標為大家找一點生機，為什麼我第一次做好人就這樣待我?當我解開鎖鍊後，海魔亦再回來了，它張開那血盤大口要把我吞食，幸好我亦有充足的時間擺出一個完 美無瑕、無械可擊的姿勢，決定和它一決生死，依我所知里昂(Neo)當年亦有一個差不多的情況!?

我的結局要再多等數月知道、各位請保持高漲的情緒來迎接我吧！


Captain 知比 Sparrow
Pirates of the Caribbean: Dead Man's Chest

PS 想知道鎖匙小狗的結局，請留意字幕後最後三秒!